Tīmoti Kāretu

I whai a Tīmoti Samuel Kāretu i tana Tohu Kaiako mō roto i ngā kura tuarua ki te whakaako i ngā marau o te reo Wīwī, te reo Tiamana, te reo Māori me te reo Ingarihi. Heoi anō, ko te nuinga o āna mahi kei rō whare wānanga kē. Kua aua atu tana tino aro ki ngā reo, mātua ake ko te reo Māori me ngā tikanga Māori, tae noa atu ki te reo o Hawaii me ngā tikanga o Hawaii, engari kua whakamātau hoki ia i ētahi reo o Uropi.

Mai mai, ko te kapa haka tētahi kaupapa nui taioreore ki a ia, hei kaihaka, hei kaitito, hei kaiako, hei kaiwhakawāwā, hei kaiwhiriwhiri. Ko tāna tino aronga, ko te haka me ōna āhua katoa me ngā waiata koroua. Ko te reo mōteatea tētahi reo whakamīharo i a ia, me te āhua o tana kawe. He hōhonutanga kei roto i te reo o ngā waiata koroua, me uaua ka kitea i roto i ngā titonga o ēnei rā. Ko te kaupapa e kōkiri nei ia ināianei, ko te whakaatu ki ngā reanga o inamata te kounga o te reo, e titia ai tōna rerehua ki te ngākau tangata, haere nei te wā, haere nei te wā.

Kei te mōhio koe ko te hoariri nui, ko te ito nui o te reo ko te Māori tonu, ehara i te Pākehā. Ko tātou Māori tonu nei ngā mea kei te kaha takahi, kei te whakahāwea mai, kei te whakaiti mai, kei te aha mai, kei te aha mai. Nā reira, ko tō tātou whawhai nui ki a tātou anō.